الدلالة الصينية

دلاله احر طراز made in china

عشنا وشفنا

والدلاله للي ميعرفش هي ست كانت بتبيع ملابس وبتلف بيها على البيوت وهي اختراع مصري اصيل

ولكن الصينيين العفاريت اللي مابيهمدوش سرقوا الاختراع المصري وياريت طبقوه عندهم لا دا انتشروا في شوارع وحواري المدن والقرى المصريه زي النمل

وماتتفاجئشي لو حد خبط عليك بليل وفتحت الباب وبصيت مالقتشي حد ...!!! لا متقفلشي الباب انزل بنظرك لتحت حتلاقي بنت قصيره عامله ديل حصان وشايله ياعيني مخله من بتوع ا لجيش وحاضنه كيس تاي ملاينيين هدوم ويتقولك بلهجه مصريه مكسره :عاوزيين هدوم؟

اكيد حتصعب عليك من الشيله اللي على ضهرها والمصري حنين واكيد حتشتري منها

لا استنى

والنبي بلاش الحنيه الزياده

ياعمي دول ماكفاهمش انهم بيقفلوا المصانع بتاعتنا بسبب منتجاتهم الرخيصه . كمان بيزودوا نسبة البطالة و بيقطعوا على اصحاب محلات الملابس الغلابه اللي في القرى اصحاب المحلات اللي مخروب بيتهم م الضرائب والتامينات ورسوم النظافه والسجل التجاري ........الخ

عمري ماشفت دوله في العالم يتسيب الاجانب يشتغلوا من غير تصريح عمل او اقامه احنا بلد كله ترحاب ومصر هي ام الدنيا
والله خايف ييجي اليوم اللي الاقي فيه النجار والكهربائي والطعمجي صينيين والمصرييين فاعدين في البيوت من غير شغل
الحل نعمل ايه نروح الصين ولانجوز الدلاله الصينيه؟؟؟؟