انجليزي الموبايل؟!!!

مش عارف ايه اللي طالع علي شباب اليومين دول قصدي الشباب الصغير او المراهقين

كل ماشوف موبايل الاقيه قالب لغة الموبايل انجليزي؟؟

انا مش بقول على اللي في مدارس لغات يمكن هما متعودين او اسهل ليهم كده مع انه الاصل هم لغتهم الاساسيه

انا بقول على شباب لا بيعرف عربي ولاحتى انجليزي قال يعني لما يخلي موبايله على اللغه الانجليزي يبقى الواد متطور وكوول

الموضوع كبير فيه استبراء وكراهيه للغتنا الاساسيه وكانها لغة للمتخلفين

مع انها افضل لغات العالم والدليل على كده انها اللغة التي نزل بها القران الكريم

واكيد من اقوي اللغات من حيث التعبير وكمان مافبهاش حروف تكتب ولاتقراودا ضعف ولخبطه في اللغه الانجليزيه

ياجماعه انا بعرف انجليزي معقول يعني واتمنى اعرف لغات تانيه بس للاستفاده من الاشياء اللي باللغات دي بس عمري ماشفت واحد انجليزي بتبرا من لغته وبيتكلم فرنساوي او عامل موبايه فرنساوي

عمرنا ماحنتقدم الا اذا اعتززنا بانفسنا ووثقنا من نفسنا وبلاش تقليد اهبل لاننا مهما عملنا فاحنا عرب في الاخر

فلازما كلمة عربي تبقى كلمه كويسه مش شتيمه

انا وصدام

فعلا انا وصدام مش تخريف ولا شارب حاجه
اقولكوا الحكايه
الزمان سنة 1989
المكان العاصمة اليمنية صنعاء
كنت طالب في ثانيه ثانوي في مدرسة عبدالناصر الموجوده في وسط العاصمة اليمنيه على بعد 10 دقائق من القصر الجمهوري
والحكايه ان اي رئيس كان بيزور اليمن كانو بيطلعونا نمسك صورة الرئيس الضيف وصوره الرئيس اليمني
وجه يوم كان الزائر هو صدام الذي كان يحظى بشعبيه كبيره في اليمن وبحب كبير
كان راكب عربيه فخمه وراكب بجوار علي صالح الرئيس اليمني اللي كان سايق العربيه
وتوقفت العربيه امامي كان يفصل بيني وبين صدام متر واحد انسان شكله له هيبه كبيره اتذكر وجهه الجامد وابتسامته التي تملؤها الثقه او قل الغرور وشاربه الضخم الخلاصه انسان من الناس التي تهزك اذا وقفت امامها
ترى هل كنت اتخيل وانا اقف امامه ان هذا الرجل سيكون حديث العالم بعد عامين من هذا الموقف هل كنت اتخيل ان هذا الرجل سيؤثر في تاريخ المنطقه العربيه وفي مستقبلها في السنين القادمه هل كنت اتخيل هذه النهايه لهذا الرجل
لااعرف ولكن كل الذي اتذكره هو ذلك الرجل انه فعلا المهيب الركن.................

0900 999 اتصل الان !!!

طبعا كلنا دماغنا صدعت من اعلانات 0900 سعر الدقيقه 1.5 نصب علني والمهم هما يكسبوا وطظ في المواطن الغلبان اللي مش لاقي ياكل ناقص كمان نظبطه ونلعب في دماغه ونخليه يتوهم انه حيكسب عربيه او 10000 جنيه من مجرد مكالمه تليفون وطبعا الاولاد اكثرا طموحا وحرمانا من اهلهم وكتير بيتصل من ورا اهله عشان يعملهم مفاجاة ويكسبهم
والمفاجاة لفعليه ان الراجل الغلبان اتقلب في اكتر من تلتين اربعين جنيه في الفاتوره على وش 0900 وشوف بقى كام مواطن غلبان واضرب في كام مليون وانت تعرف المكسب
والغريب ن الكلامده قصدي النصب ده بقا مصرح بيه علني والكل شارك فيه من اول شركة الاتصالات الى نجوم الفن والكوره وحتى بعض الرجال الذين يلبسون عباءة الدين من اجل المال حتة انهم استغلوا مشاعر الناس الدينيه في حبهم للحج والعمره واحتياجهم وعدم قدرتهم على ادائها
ياترى المواطن حيتحمل ايه ولاايه لنا الله

مسلسلات رمضان

طبعا من الملاحظ من كام سنه تراجع الدراما المصريه وتقدم الدراما السوريه في كل حاجه من القصه للاخراج والامكانيات واكيد فيه اسباب اخرى
السنه دي حاولت اجي على نفسي واقنع نفسي ان المسلسلات السنه دي افضل
وبعد اول حلقتين من كام مسلسل لاقيت المعظم تعبان
عموما انا حتكلم عن مسلسلين
الاول الدالي في رايي انه افضل مسلسل شفته يس برضه في مط وتطويل لزوم البيع والفلوس
ثانيا كلمه المافيا مع (تفخيم الميم )
معرفشي ليه هما بيقولوها كده الكلمه اللي اتكررت كتير قوي حسستني اني عايش في فيلم اجنبي
وتاني حاجه كميه الاحضان اللى بين الدالي وبين رفقي عزيز طبعا المؤلف عاوز الناس تسقفلوا لانه بيعكس الوحده الوطنيه يس بطريقه
مبالغه ومش منطقيه
المسلسل التاني اللي خنقني شرف قفل الباب قصدي فتح الباب
مسلسل تافه وغبي الفخراني في هبوط مستمر مش عارف واخد 5 مليون على ايه
طبعا قصه مستهلكه عن موظف مختلس وخبى الفلوس بره زي فيلم رمضان فوق البركان بس عادل امام دفن الفلوس تحت الارض
الفخراني انصح حطها في خزان مياه
وطبعا عشان المؤلف مبدع وعمل قصه جديده قال ايه حشر حكاية الخصخصه والمعاش المبكر في الموضوع فيبقا كده القصه جديده جاي
يتكلم على الخصحصه بعد ييجي عشرين سنه من بداية الخصخصه
مش بقلوكوا مسلسلات خنقه
طبعا مسلسلات السيت كوم ربنا يزيد ويبارك بعد نجاح تامر وشوقيه وراجل وست ستات ظهر خمسمية مسلسل عباس وايناس وكافيه تشينو وخلافه وطبعا كلها شبه بعضها ومعظمها استظراف طبعا احنا بنخب نقلد بعض في كل حاجه لو واحد فتح سيبر ونجح البلد كلها
تفتح سيبرات طبعا الفن انعكاس للمجتمع